الحقوق والواجبات

كنت نتمنى نعيش في دولة يكون مواطنيها الكل يتمتعوا بنفس الحقوق والواجبات لكن هذا مازال بعيد علينا ...مثال بسيط : أنا البوسطة تسالني 68 دينار( وبصراحة قاعد نخممم كيفاش بش نخلصهم نهار إلي نسافر ) كان نحاول نسافر تو نمنع من السفر حتى نخلص و بوشلاكة سرق من الدولة مليون دولار والتهمة ثابتة عليه ونهار كامل يحوس في بلاد ربي الواسعة ما غير ما توقف وما طالبوهش بش يردهم قبل ما يسافر . بعد هذا أنا قررت نسافر ما غير ما نخلص وهذا يجي من اقتناعي أن الدولة لازم تعمل ابنائها بنفس الطريقة(بالمثل) وقررت نهار إلي نسافر نهز معايا حشد عظيم من أصحابي ومن الناس المساندة لمطلبي البسيط للمعاملة بالمثل ونهز زادة برشة حقوقيين و سياسيين ووقت إلي يطالبوني بالخلاص نطالبهم بإلقاء القبض على بوشلاكة إلي سافر وعاود ما غير ما خلص وأن مقتنع أشد الإقتناع إلي بوشلاكة ما زايد علي شي وإلي أنا خير منو بما أني ما سرقتش فلوس الدولة وسامحوني كان قلقتكم