لا نهضة لا نداء الشباب هو الحل

برشةمن اصدقائي لامو ويلوموا علي إلي أنا مع إسقاط النظام ويبرروا في لومهم باللي المرة هذي ثورة مضادة وإعادة للنظام السابق ( نداء تونس ) في أغلب الأوقات ما نجاوبهمش ... بش نكون واضح مع الناس الكل ومتناسق مع مبادئي أن ضد نداء تونس لكن مع اسقاط النظام ، الأحزاب تطالب بإسقاط الحكومة و التأسيسي ( ثمة نقاش ) أنا نطالب بإسقاط النظام كامل والنظام هذا ما يسقط كان بإطاحة الحكومة هذي وإلي بعدها وإلي بعدها حتى يقدر علينا ربي ويسقط هذا النظام الفاشل لكن يلزم خدمة كبيرة بش يتطور المجتمع التونسي ويعرف قوته ويرجع فاعل مش متلقي للتعليمات والأوامر ويتخلص من برشة أمراض قاعدة تنخر فيه ؟الأمراض هذي متسببة فيها الأجيال السابقة إلي تحكم فينا توة سواء في المعارضة أو في الحكم إذن أول حاجة يلزم تتعمل هي إقصاء الأجيال هذي إلي تسببت في تخلف مجتمعنا

برشة ناس وأصدقاء ماهمش بش يعجبهم كلامي وهذا شيء عادي ، بالنسبة الصراع إلي صاير توا مهوش بين حكومة ومعارضة لكن صراع أجيال صراع ما بين أجيال ناضلت صحيح لكن ما عادش صالحة لتوة وما بين شباب ناشط حيوي وثوري لكن مشكلته إلي مازال ما يؤمنش بروحه ومهوش كيف الأجيال الأخرى إلي تقبل المساومة جيلنا يا ناس جيل تظلم في كل شيء وثار على الوضع ورفع مطالب واضحة ورفع سقف المطالب و طرد دكتاتور لكن بعد حقروه وهمشوه كيف مكان يعمل الدكتاتور ... جيلنا عندو الشرعية الثورية و حتى بالإحصائيات الشباب أكثر من الشيوخ

أنا ما كنتش مناضل وما دخلتش الحبس كيف برشة اخرين أقصى حاجة كنت نعملها هي إلي نحكي على مأساتنا للأجانب وقت إلي يبدو معايا مجموعة من المثقفين و كنت ساعات نشري جريدة الموقف كانت بدينار، هذا رأيي الخاص وقت إلي يتحسم صراع الأجيال في تونس لصالح الشباب وقتها نجم نقول تونس ماشية في الطريق الصحيح ما عدى ذلك راني بش نكون ديمة مع اسقاط النظام وسامحوني كان قلقتكم