في العائلة سلفي

خالتي عندها مدة ما جاتش طلت علينا في جربة وهي تسكن في العاصمة جات عدت بحذانا يومين ...الحقيقة فرحنا الكل وزدنا فرحنا بخالي إلي جاء من هولندا يطل ... أنا قريب برشة من خالتي ونحبها برشة لكن أنا غالط معها على طول إلي ما نمشيش نطل عليها كل مرة نمشي لتونس . جات تشكيلي من ولدها إلي رجع سلفي علمي وما عادش يسمع كلامها ولا كلام بوه ما عادش يقبل النقاش وكل مرة يلمحلهم إلي إسلامهم مش صحيح ويقوللهم إلي ثمة توانسة مشاو يقراو عقيدة في السعودية عامين وراجعين يعلمو التوانسة الدين الإسلامي الصحيح ...كل ما خالتي تحب تحكي معه وتقولوا اقرا الشيخ الطاهر بن عاشور يقوللها هكا علماني وجماعة الزيتونة والأزهر إسلامهم غالط هذا اش علموه شيوخو ...ولد خالتي هذا عمرو 15 سنة وخالتي خايفة عليه والمستشيخين الوهابيين مكسحين قلبه على والديه ربي يهدي ولد خالتي وربي يهلك إلي كان السبب وسامحوني كان قلقتكم