من أجمل النصوص سنة 2013
نص توفيق بن بريك في أربعينية البراهمي
مبــاركــه يا لخـــيه
مباركه يا لخيه،
لفراڤ صعيب. توحشتك. توحشت لبنات. شنوه حوال عدنان؟ كبر. توحشت تنڤريزك، توحشت حثلتك إلي ما توفاش في الدار، توحشت نشوفك إطيّب وتغسل. توحشت كسكسيك وخبزك وبراد التاي منعنع، توحشت وجهك الطيب، توحشت تحكيلي. أحكيلي آش عاملة في القضيه؟ لبنات إيعاونوا فيك؟ كيفاش عامله في الفلوس؟ ثمه شكون إيعاون فيك؟ ماتتصورش ڤداش مشغوب عـ لحكايه؟ الدنيا خليتها غلات وڤالولي زادت غلات، الخبز زاد والطماطم زادت... إنشالله صبولك الشهريه، ما قصوهاش؟ لبنات وعدنان ڤربوا يرجعوا للقرايه، عندك ما يكفيك باش تقيم بيهم؟ نحبك تلبسهم أحسن لبسه وتوكلهم الخير والبركه. ما تخليهمش يفقدوني. إنت توى البو ولُمْ.
مباركه يالخيه،
بربي لا تتغشش عليّ. نعرف إلّي ما خليتش ورايه هناشر وفلوس وبالاصات. كنت إنحب إنخليلك مايسترك ويستر أولادي. أما خليني إنڤلك راني مانيش نادم عـ العيشه إلى عشتها معاك. الخبز من إيديك إيولي رفيس، النومه بحذاك، نظافه وحليب، ڤعده معاك ومع لولاد في بيت لفطور وريحة المرڤة بالعلوش مالية الدار، خيرلي مـ الدنيا وما فيها. نحب إنڤلك إلي حبيتك، حبيت ضحكتك، حبيت بكاك، حبيت كلامك، حبيت سكاتك، حبيت وقفتك. كل دقيقة عديتها معاك حبيتها إدوم. ما إشبعتش منك. اخذيت منك الثبات. كـ تشوفني إتعبت وإلاّ غمضت عين، تفيقني وتوڤفني. خزرتك لدنيا خلتني نشوف مليح، نعرف الطريق إلي إيوصل، ساعدتني عـ هم الدنيا، ما خليتنيش متردد، ماخليتش الخوف ينبت في لساني. ديما عندك كلمة باهية، نظرة صادقة، ما عمرك ما غيرتني وإلاّ نكدت علي. نحب نسهلك منين البال الواسع الكل هاذا؟ منين عندك القوة الكل؟ منين عندك الطيبه الكل؟
مباركه يالخيه،
يرحم لم لضناتك. راني حال فمي فيك، كـ التوانسه الكل، حال فمي فـ المراء التي خرجت إتزغرد في موت راجلها، حال فمي فـ المراء إلى علا صوتها، حال فمي في المراء إلي وليت، مراء كاللبه تزهر، مراء سرح صوتها وسمعت بيه البرنيّه ولَعْدَاءْ وأولاد عمومتنا. إتهنيت. متهني بيك راك مراء ونص.
مباره يالخيه،
إتهني. ماتقلقش عليّهْ. مشيت بالي مرتاح. راضي. نحب إنڤلك حبيتك.
الحاج محمد لبراهمي
نص توفيق بن بريك في أربعينية البراهمي
مبــاركــه يا لخـــيه
مباركه يا لخيه،
لفراڤ صعيب. توحشتك. توحشت لبنات. شنوه حوال عدنان؟ كبر. توحشت تنڤريزك، توحشت حثلتك إلي ما توفاش في الدار، توحشت نشوفك إطيّب وتغسل. توحشت كسكسيك وخبزك وبراد التاي منعنع، توحشت وجهك الطيب، توحشت تحكيلي. أحكيلي آش عاملة في القضيه؟ لبنات إيعاونوا فيك؟ كيفاش عامله في الفلوس؟ ثمه شكون إيعاون فيك؟ ماتتصورش ڤداش مشغوب عـ لحكايه؟ الدنيا خليتها غلات وڤالولي زادت غلات، الخبز زاد والطماطم زادت... إنشالله صبولك الشهريه، ما قصوهاش؟ لبنات وعدنان ڤربوا يرجعوا للقرايه، عندك ما يكفيك باش تقيم بيهم؟ نحبك تلبسهم أحسن لبسه وتوكلهم الخير والبركه. ما تخليهمش يفقدوني. إنت توى البو ولُمْ.
مباركه يالخيه،
بربي لا تتغشش عليّ. نعرف إلّي ما خليتش ورايه هناشر وفلوس وبالاصات. كنت إنحب إنخليلك مايسترك ويستر أولادي. أما خليني إنڤلك راني مانيش نادم عـ العيشه إلى عشتها معاك. الخبز من إيديك إيولي رفيس، النومه بحذاك، نظافه وحليب، ڤعده معاك ومع لولاد في بيت لفطور وريحة المرڤة بالعلوش مالية الدار، خيرلي مـ الدنيا وما فيها. نحب إنڤلك إلي حبيتك، حبيت ضحكتك، حبيت بكاك، حبيت كلامك، حبيت سكاتك، حبيت وقفتك. كل دقيقة عديتها معاك حبيتها إدوم. ما إشبعتش منك. اخذيت منك الثبات. كـ تشوفني إتعبت وإلاّ غمضت عين، تفيقني وتوڤفني. خزرتك لدنيا خلتني نشوف مليح، نعرف الطريق إلي إيوصل، ساعدتني عـ هم الدنيا، ما خليتنيش متردد، ماخليتش الخوف ينبت في لساني. ديما عندك كلمة باهية، نظرة صادقة، ما عمرك ما غيرتني وإلاّ نكدت علي. نحب نسهلك منين البال الواسع الكل هاذا؟ منين عندك القوة الكل؟ منين عندك الطيبه الكل؟
مباركه يالخيه،
يرحم لم لضناتك. راني حال فمي فيك، كـ التوانسه الكل، حال فمي فـ المراء التي خرجت إتزغرد في موت راجلها، حال فمي فـ المراء إلى علا صوتها، حال فمي في المراء إلي وليت، مراء كاللبه تزهر، مراء سرح صوتها وسمعت بيه البرنيّه ولَعْدَاءْ وأولاد عمومتنا. إتهنيت. متهني بيك راك مراء ونص.
مباره يالخيه،
إتهني. ماتقلقش عليّهْ. مشيت بالي مرتاح. راضي. نحب إنڤلك حبيتك.
الحاج محمد لبراهمي
ليست هناك تعليقات:
إرسال تعليق